قصة الفأس والشجرة برؤيتي وإلقائي

اسَيِّل من عيون الشعر بالكراس
لك ابيات فريده تشبه احزاني


غريب بدنيتي والناس ماهي ناس
ادورني فرح وازريت لا ألقاني

هَمَا غيمي على ذيك الصدور احساس
ولا اعشب طيبي بجرْهَدْهُم الفاني

سكن في قلبي الفضه كثير اجناس
بشر ياكثر ما اعطشها وترواني

وانا ياما مشيت بدرب ماينداس
لحاجات الصحيب وخطوة العاني

اقَلَّطْهُم بصدر الطيب والنوماس
ويطعن ظهري المغتاب والشاني

انا كني كليب وكنهم جساس
وثقت بطيبتي وآمنت عدواني

الا ياحظي الي له عيون نعاس
اذا كان الشجر مجني من الجاني?

وجاوبني الشجر مالوم حد الفاس
الومه كيف وايدينه من اغصاني

اذا جا الجرح من خلٍ عريب الساس
سكت وماتت الهقوات بحضاني

ترى ماكل كفٍ يا فهد ينباس
ولا قَبَّلْت غير كفوف شِيباني

مصالح والمصالح عندهم تنقاس
اذا لي مصلحه تضحكلك اسناني

وقال الطيب ياكف العطا لاباس
اذا. قل الوفا وازداد نكراني

تفائل لاتشوف الفارغ من الكاس
على الله احتسبني وانت تلقاني

يقولون الخلايق عرقها دساس
وكفك مابه اصبع يشبه الثاني

وانا لي حكمةٍ وتضمها اقواس
ويبقى الي بوجداني بوجداني

عروق الفحم ماتشبه بريق الماس
جمال القصر نسانا من الباني

ابنشد عن شجر وعروقه اليباس
ودومٍ له ثمر لوماله اغصاني

ترى ماينكر المعروف غير خساس
ولا ينقض عهوده غير خواني

رفيقي لاشراني ما رجع بفلاس
سقيته طيب لين الطيب ينخاني

ولاخير برفيقٍ لين صابك باس
مسَك درب الهجاج وجرحك يعاني

خلقنا من ترابٍ بالقدم ينداس
نسينا ان النهايه قبر واكفاني

يطيب المجلس ان طابو به الجلاس
الا من طَيَّبوه بعطر الايماني

رجال الذكر هم لَطَّامَة الخناس
ولا يشقى بهم قاصي ولاداني

ويبقى الستر والتقوى بياض لباس
ومن لا نالها خاسر وعرياني

على رجمٍ عظيمٍ ماوطته انجاس
وقفت. ولي قنيب الذيب سرحاني

وحيد بدنيتي والناس ماهي ناس
على موعد وفا وازريت ماجاني